Лондон, 23 ноември 2022 (МИА) - Доколку се оствари планот на Брисел да воведе ограничување на цената на клучниот референтен показател за гас во Европа, трговците ќе треба да предвидат исплати за дополнителни 33 милијарди долари, се наведува во процените на Лондонската интерконтинентална берза (ИЦЕ). Производителите и трговците кои се потпираат на холандскиот центар за фјучерси за гас ТТФ би можеле да се соочат со 80 отсто зголемување на плаќањата. Такво предупредување испрати берзата до Европската комисија, пишува „Фајненшл тајмс“, повикувајќи се на меморандум до кој новинарите имале пристап. Таквото зголемување на гарантните депозити може да го „дестабилизира пазарот“, додаде платформата за размена која управува со пазарот на фјучерси, ТТФ. Според Европската централна банка (ЕЦБ), гаранциските депозити и фјучерсите што ги користат производителите на енергија веќе се двојно зголемени во цената оваа година. Тоа принуди многу компании да прибегнуваат кон кредитни линии и да вршат повеќе приватни трансакции приватно, бидејќи безбедносните депозити се помали. ЕУ работи на финализирање на плановите за ограничување на цените на гасот поради енергетската криза во Европа. Европската комисија вчера предложи да не се купува гас во ЕУ по цени над 275 евра за мегават час. ми/