Тетово, 11 јануари 2024 (МИА) - Директорот на Центарот за управување со кризи (ЦУК), Стојанче Ангелов, имаше излагање за можностите на единствениот број за итни случаи 112 и ЦУК, на специјализирана обука за управување со ризици и стандардни оперативни процедури што се одржа денеска на Шар Планина.

Како што известуваат од ЦУК, Ангелов се осврнал за можностите што ги нуди 112 за барање и спасување, прва помош, транспорт на жртви, како и за новитетите на овој простор, согласно стандардните оперативни процедури во Системот за управување со кризи. Покрај него со свои излагања зедоа учество и организаторот Костантин Циривири од Центарот за образование и научно истражување „Планинска Академија“ под раководство и директорот Ибрахим Дехари на ЈУНП Шар Планина.

- Обука е насочена кон стекнување вештини за водење туристи и менаџмент со „фри рајд“ операции, со ратрак (возило што се движи врз снег), со цел истата да се изведува на безбеден начин според највисоките стандарди, како и според најстрогите стандарди за зачувување на животната средина, со крајна цел создавање туристички атрактивна дестинација, а по принципот на „слободно движење“ во природата кога има снег. Инаку, „фри рајд“ со ратрак (возило што се движи врз снег) на ниво на Евроазија за првпат е развиен во Западен Балкан и е оценета оваа активност меѓу петте најдобри зимски авантури во светот, информираат од ЦУК.

Центарот за образование и научно истражување, Планинска Академија под раководство на Костантин Циривири ја изведува обуката со негов персонал во неколку групи на операторот за „фри рајд“ скијање „Ескимо Спорт“ од Тетово.

- Ова е завршна фаза од обуката со првата група во чијшто состав има врвни професионалци во скииспортовите и екстремните активности, меѓу кои и Ненад Пешут првиот и неколкукратен светски првак во „Бејзџампинг“ и хрватски репрезентативец во „Падобранско скијање“ со учество на неколку олимпијади, како и Санда Јелачиќ, од Хрватска „сноу борд“ репрезентативка. Целиот настан е поддржан и од Томислав Тишка, сопственик на компанијата „Ескимо Фрирајд“, којшто е и над 12 години директор и на Хрватскиот скијачки сојуз и натпреварувач во „сноуборд“ светски куп, а и иноватор – конкретно тој е пионер на „фри рајд“ скијањето во Европа и Азија, соопштија од ЦУК.

Обуките се почнати од април 2022 година и се изведуваат неколку пати годишно со теоретски и практичен дел. ас/

Фото: ЦУК