Скопје, 4 август 2023 (МИА) - Директорот на Бирото за јавна безбедност Сашо Тасевски, заедно со стратешката група при БЈБ со работна посета на СВР Штип и ОВР Свети Николе, продолжија работните средби во рамки на реализацијата на мерките и активностите предвидени со оперативниот план „Безбедно лето 2023“. Во текот на посетата беше реализирана средба со раководството на овие организациони единици, но и на Регионалниот центар за гранични работи „Исток“. 

-За време на средбите директорот Тасевски беше информиран дека во текот на првото полугодие од 2023 на целото подрачје на СВР Штип криминалитетот бележи намалување за 17 проценти, со ефикасност во расчистувањето на кривичните дела од 68,5 проценти, додека само на подрачјето на ОВР Свети Николе за 14 проценти, при што постигнатата ефикасност во расчистувањето на кривичните дела е дури 83 проценти. Општиот криминал  бележи  намалување  од 17 проценти, при што расчистени се 64 отсто од вкупно пријавените кривични дела, додека ефикасноста во кривичните дела од општ криминал на подрачјето на ОВР Свети Николе изнесува 81проценти, информираат од МВР.

Раководството на СВР Штип извести и дека во текот на првото полугодие од 2023, тешките кражби на ова подрачје се намалени за 21 отсто, додека намалување од 27 проценти има и кај кривичните дела од областа на економскиот криминал.  Кај делата од организиран криминал евидентирано е намалување од 50 отсто, а за споменување е сузбиената организирана криминална група која вршела препродажба на наркотични дроги марихуана, кокаин и амфетамин.

Во областа на сообраќајот за шесте месеци во 2023 година на територијата на СВР Штип евидентирано е и намалување за 9 отсто на сообраќајните незгоди со потешки последици во однос на ланската година, а тенденција на намалување имаат и прекршоците во областа на јавниот ред и мир, кое на подрачјето на ОВР Свети Николе достигнува околу 60 отсто.

Стратешката група при БЈБ беше информирана и за реализираните 1.113 превентивни активности во првата половина од годината, кои придонесуваат за добрите резултати на СВР Штип, на различни теми, самостојно или во соработка со локалните совети за превенција.  Во рамки на оперативниот план „Безбедно лето 2023“, само во јули на подрачјето на СВР Штип се реализирани 230 превентивни активности, 36 кампањи, од кои 17 се од областа на сообраќајот.

-На средбата беше разговарано и за резултатите од работењето на Регионалниот центар за гранични работи Исток, каде во првата половина од оваа година е забележано зголемување на протокот на патници за 16,4 отсто и намалување на криминалитетот за 51,7 отсто. Намалување е евидентирано и во делот на илегални минувања на државната граница, и тоа за 90,2 проценти, поточно илегалните преминувања на државната граница со Бугарија се досега на најниското ниво, додека бројот на откриени фалсификувани документи користени при преминување на државната граница бележи зголемување за дури 150 отсто. Кај оперативните активности во врска со нелегалната сеча на дрва и пустошењето шуми евидентирано е зголемување од 112,5 отсто, при што за 241,9 проценти е зголемена и количината на запленети дрва, се вели во соопштението од МВР.

Во рамки на оперативниот план „Безбедно лето 2023“, РЦ Исток спроведе 13 превентивни активности, еден реализиран случај за криумчарење на 673 парчиња забранети медицински средства – стероиди и девет обиди за илегално преминување на границата, заедно со Фронтекс, при што биле откриени 21 мигрант.  сст/ац/

Фото: МВР