Димитриевски: Притисоците се интензивираат, дополнително ме мотивираат да го демонтираме овој режимски систем
- Градоначалникот на општина Куманово и кандидат за претседател од движењето ЗНАМ – За наша Македонија, Максим Димитриевски денеска на социјалните мрежи објави дека добил покана да се јави во обвинителството бидејќи е обвинет за кривично дело „неизвршување на судска одлука“.
![Димитриевски: Притисоците се интензивираат, дополнително ме мотивираат да го демонтираме овој режимски систем](https://new.mia.mk/index.php/images/20240408144118_big_730x400_24.webp )
Куманово, 8 април 2024 (МИА) - Градоначалникот на општина Куманово и кандидат за претседател од движењето ЗНАМ – За наша Македонија, Максим Димитриевски денеска на социјалните мрежи објави дека добил покана да се јави во обвинителството бидејќи е обвинет за кривично дело „неизвршување на судска одлука“.
Од ЈОРСМ за МИА информираат дека не станува збор за обвинение, туку е истрага за поднесена кривична пријава од физичко лице за неизвршување на судска одлука и Димитриевски е повикан на распит.
Димитриевски обвини за притисоци.
- Притисоците не престануваат, туку како и што очекував се интензивираат. Ваквите постапки не ме обесхрабруваат, туку дополнително ме мотивираат да го демонтираме овој режимски систем. Ќе има и правда, а ќе има и мир, а непристрасните професионалци ќе добијат шанса да изградат и правен и функционален државен систем, објави Димитриевски на неговиот фејсбук профил.
Претходната недела во Основниот суд се одржа прво рочиште против Димитриевски, за злоупотреба на службена положба и овластувања, по кривична пријава поднесена од две кумановските градежни фирми. ам/цр
Фото: МИА архива