Кавадарци, 16 јули 2024 (МИА) - Детска колонија се реализира вечерва во дворот на Винскиот музеј Кавадарци. Осумдесетина дечиња сликаат дела под менторство на ликовни уметници педагози и вработени во Музејот. Настанот е резултат на заедничката соработка меѓу оваа културна установа и Здружението на кавадаречки уметници, „Роднокрајци“.

Цртежите од изложбата утревечер ќе бидат презентирани на градскиот плоштад. Изложбата ќе биде од хуманитарен карактер, а парите од продадените цртежи ќе бидат донирани во хуманитарни цели.

- Вински музеј континуирано организира голем број на настани за сите генерации. На тој начин ја презентираме историјата, културата и традицијата на овие простори. Истовремено, со хуманитарниот карактер на настанот, упатуваме порака до пошироката заедница, да се следи нашиот пример и да се помогне, таму каде што е неопходна поддршка, нагласи за МИА, Анета Атанасова, в.д директор на Музејот. 

Според претседателот на „Роднокрајци“, Ќиро Јосифо, Кавадарци е расадник на млади ликовни таленти и дека секогаш им даваат поддршка на младите во изразување на нивниот уметнички израз.

Колонијата е финансиски поддржана од локалната самоуправа и е во рамките на „Кавадаречко културно лето“. свд/бд/

Фото: МИА