Две награди за претставата „Се викам Горан Стефановски“ на Драмски театар на Фестивалот во Ниш
- Драмски театар - Скопје на театарскиот фестивал „Театар на крстопат“ (Театар на раскршќу) во Ниш освои две престижни награди, награда за најдобра претстава и награда за режија.
![Две награди за претставата „Се викам Горан Стефановски“ на Драмски театар на Фестивалот во Ниш](https://new.mia.mk/index.php/images/20221113220258_big_730x400_62.webp )
Скопје, 12 септември 2022 (МИА) - Драмски театар - Скопје на театарскиот фестивал „Театар на крстопат“ (Театар на раскршќу) во Ниш освои две престижни награди, награда за најдобра претстава и награда за режија.
Како што соопшти Драмски театар - Скопје, наградата за најдобра претстава „My Name Is Goran Stefanovski“ - „Се викам Горан Стефановски“ ја доделува жирито на тркалезната маса на критика, додека наградата за режија ја доделува Стручното жири на Фестивалот. Наградите на фестивалот ќе бидат врачени вечер, на свеченост по повод затворањето на третото издание на Фестивалот.
Ова е трето меѓународно гостување на „My Name Is Goran Stefanovski“ – „Се викам Горан Стефановски“ во режија на Бранислав Миќуновиќ. Драмски театар годинава имаше забележителни изведби на оваа претстава и на гостувањата на ревијалниот фестивал „РУТА“ во Подгорица и на 56-то издание на „Стериино позорје“ во Нови Сад.
Народниот театар од Ниш беше домаќин на шест театарски ансамбли од регионот што учествуваа во натпреварувачкиот дел. Во текот на фестивалската недела се оддржаа многубројни промоции, тркалезни маси и работилници со цел да се иницираат копродукциски соработки за афирмација на сличностите и разликите на културниот идентитет на театарската сцена во регионот.
Претставата „My Name Is Goran Stefanovski“ – „Се викам Горан Стефановски“ на Драмски театар Скопје беше изведена во сабота, на 10 септември 2022 година.
Драматург на претставата „My Name Is Goran Stefanovski“ – „Се викам Горан Стефановски“ на Драмски театар Скопје е Бранислава Илиќ, драмски писател и професор на Факултетот за драмски уметности во Белград.
Претставата е авторска адаптација од изборот на драми и монтажа на сцени од седум драми на Горан Стефановски напишани во периодот од 1987 до 2021 година („Црна дупка“, „Лонг плеј“, „Сараево“, „Казабалкан“, „Хотел Европа“, „Euroalian“ и „Одисеј“)
Сценограф на претставата е Александар Дениќ, автор на музиката Влатко Стефановски. Улогите во претставата ги толкуваат актерите: Биљана Драгиќевиќ – Пројковска, Јелена Жугиќ, Софија Куновска, Соња Стамболџиоска, Ана Димитрова, Мето Јовановски, Драган Спасов – Дац, Игор Ангелов, Златко Митрески, Стефан Вујисиќ, Дамјан Цветановски и Саша Димитриевска. мд/са/
![„Се викам Горан Стефановски“](/articles/images/%d0%b4%d0%b2%d0%b5-%d0%bd%d0%b0%d0%b3%d1%80%d0%b0%d0%b4%d0%b8-%d0%b7%d/XiE38FzfR/placeholder.webp?use_watermark=0)