Гувернерот на Калифорнија сака да ја ограничи употребата на паметни телефони во училиштата
- Гувернерот на Калифорнија, Гевин Њусом, синоќа објави дека сака да биде ограничена употребата на паметни телефони кај учениците во текот на училишниот ден, наведувајќи ги ризиците за менталното здравје од социјалните мрежи.
![Гувернерот на Калифорнија сака да ја ограничи употребата на паметни телефони во училиштата](https://new.mia.mk/index.php/images/20240619080015_big_730x400_16.webp )
Сакраменто, 19 јуни 2024 (МИА) - Гувернерот на Калифорнија, Гевин Њусом, синоќа објави дека сака да биде ограничена употребата на паметни телефони кај учениците во текот на училишниот ден, наведувајќи ги ризиците за менталното здравје од социјалните мрежи.
Најавата доаѓа еден ден откако американскиот министер за здравство Вивек Мурти го повика американскиот Конгрес да бара платформите на социјалните медиуми да бидат означени со предупредувања за нивното влијание врз младите.
Гувернерот на Калифорнија рече дека планира да се заснова на закон што го потпишал во 2019 година, со кој се овластуваат училишните области да ја ограничат или забранат употребата на паметни телефони од учениците додека се на училиште или под надзор на вработен во училиштето.
-Како што потврди секретарот за здравство, социјалните мрежи му штетат на менталното здравје на нашата младина. Со нетрпение очекувам да работам со законодавниот дом за ограничување на употребата на паметни телефони во текот на училишниот ден. Кога децата и тинејџерите се на училиште, тие треба да бидат фокусирани на учење, а не на екраните, рече демократскиот гувернер.
Канцеларијата на Њусом не даде повеќе детали за предлогот.
Постои растечка дебата низ САД за тоа како да се решат ефектите од социјалните медиуми и користењето паметни телефони, особено врз младите луѓе.
Во Флорида, републиканскиот гувернер Рон ДеСантис потпиша една од најрестриктивните забрани во САД за користење на социјалните медиуми од страна на децата оваа година.
Собранието на државата Њујорк овој месец усвои закон кој ќе им овозможи на родителите да ги блокираат децата да примаат објави на социјалните мрежи предложени од алгоритмот на платформата.
Одборот на унифициран училишен округ во Лос Анџелес вчера гласаше округот да развие политики што им забрануваат на учениците да користат мобилни телефони во текот на училишниот ден.
Државниот сенатор на Калифорнија, Хенри Стерн, демократ кој претставува дел од областа на Лос Анџелес, воведе закон оваа година за проширување на овластувањата на училишните области за ограничување на употребата на социјалните медиуми од страна на учениците во училиштата.
-Премногу е тешко за кој било наставник, секое училиште или кој било родител сам да го сфати тоа. Има случаи кога државата едноставно мора да се вклучи и да донесе правила, рече Стерн. мс/
фото: МИА архива