Грковска на СЕФФ 2022: Создаваме општество кое ќе биде сервис на граѓаните, институциите мора да бидат професионални и транспарентни
- 31 мај 2022
![Грковска на СЕФФ 2022: Создаваме општество кое ќе биде сервис на граѓаните, институциите мора да бидат професионални и транспарентни](https://new.mia.mk/index.php/images/20221113145417_big_730x400_40.webp )
31 мај 2022
Заменичката на претседателот на Владата задолжена за политики за добро владеење, Славица Грковска денеска учествуваше на панел дискусија на меѓународната конференција „Скопски економски и финансиски форум“ СЕФФ 2022, на тема: „Новите предизвици на доброто владеење“, организирана од Министерството за финансии.
На панел дискусијата вицепремиерката Грковска истакна дека Владата на Република Северна Македонија има сериозен и одговорен пристап кон определбата да изгради општество кое ќе биде сервис за граѓаните, општество во кое институциите ќе бидат професионални, ефикасни, транспарентни и отчетни. И токму затоа нејзиниот кабинет почива на три столба, а тоа се: дигитална трансформација на општеството, транспарентни и ефикасни институции и креирање на антикорупциски политики.
„Навидум можеби овие области изгледаат како посебни целини, но во основа тие се меѓусебно поврзани и комплементарни. Интензивно работиме на креирање на ефикасни и транспарентни процеси кои ќе траат подолго од мандатот на една Влада. Услугите за граѓаните мора да бидат достапни по дигитален пат, да бидат брзи, ефикасни и точни. За таа цел веќе е почнат процесот за воведување на електронска лична карта, што е клучен чекор за дигитална трансформација на општеството. Тоа е нешто што мора да се направи, зашто со воведувањето на дигиталната лична карта на граѓаните ќе им се овозможи пристап до сите дигитални услуги“, порача Грковска.
![tГрковска СЕФФ](/articles/images/%d0%b3%d1%80%d0%ba%d0%be%d0%b2%d1%81%d0%ba%d0%b0-%d0%bd%d0%b0-%d1%81%d/81QFxeeMz/placeholder.webp?use_watermark=0)
За време на дискусијата вицепремиерката ја истакна важноста за отчетноста на институциите, со акцент на отчетност при трошењето на јавните средства. Од друга страна, со подигнување на транспарентноста се зајакнува и одговорноста на институциите и на носителите на функциите.
„Јас се залагам за политики и решенија кои ќе бидат одржливи и долгорочни, а не решенија кои се краткорочни, кои не се добро искоординирани и нема да дадат никаков ефект. Во однос на транспарентноста многу е важна и промената на нашиот менталитет. Не можам да кажам дека тоа е лесен процес. Ниту дека ќе се случи преку ноќ. Но важно е дека има силна политичка волја и што работиме интензивно на тоа“, потенцираше Грковска.
На панел дискусијата панелистите дебатираа и за владеење на правото, борбата против корупцијата и организираниот криминал, професионалниот, ефикасен и непристрасен судски систем како клучни предуслови за заштита на човековите права.
Влада на Република Северна Македонија
Сектор за односи со јавноста
___________________________________________________________
МИА овие текстови ги објавува во интегрална и оригинална форма и не е одговорна за нивната содржина, ниту за евентуалните правописни недоследности или печатни грешки.