Грковска на безбедносен форум во Вашингтон: Партнерството со САД е клучно во справувањето со малигните влијанија на Балканот
- Во рамки на посетата на САД, а во пресрет на утрешниот традиционален молитвен појадок во Вашингтон, заменичката на претседателот на Владата задолжена за политики за добро владеење, Славица Грковска денеска учествуваше на безбедносниот форум на тема „Малигното кинеско и руско влијание на Балканот“.
![Грковска на безбедносен форум во Вашингтон: Партнерството со САД е клучно во справувањето со малигните влијанија на Балканот](https://new.mia.mk/index.php/images/20240131155523_big_730x400_49.webp )
Скопје, 31 јануари 2024 (МИА) - Во рамки на посетата на САД, а во пресрет на утрешниот традиционален молитвен појадок во Вашингтон, заменичката на претседателот на Владата задолжена за политики за добро владеење, Славица Грковска денеска учествуваше на безбедносниот форум на тема „Малигното кинеско и руско влијание на Балканот“.
Вицепремиерката Грковска, како што информира нејзиниот Кабинет, во своето излагање посочи дека Северна Македонија отсекогаш била на крстосницата на различни влијанија, вклучително и оние штетните со кои се поткопуваше секој чекор што како држава го направивме за да станеме дел од Алијансата и да влеземе во ЕУ. За жал, како што истакна Грковска, овие влијанија не се намалија со влезот во НАТО, туку се интензивираа откако земјата се соочи со нови пречки во пристапувањето во Европската Унија.
Според неа, во таков контекст, штетните наративи, лажните вести и дезинформациите се шират пошироко и подлабоко во општеството.
-Сето тоа е во интерес на агендите на земји од кои Северна Македонија, историски гледано, никогаш не видела ништо добро. А растечкиот евроскептицизам и антизападните чувства кои организирано се зајакнуваат, можат да имаат далекусежни последици врз стабилноста на нашето општество и на целиот регион, истакна Грковска.
Таа изрази надеж дека САД и во иднина ќе останат наш посветен сојузник и пријател кој континуирано ги поддржува напорите на Северна Македонија за унапредување на демократијата, за владеење на правото и за градење одржливи институционални капацитети за раст и развој.
-Без партнерството со САД, ние самите не би можеле да се справиме со малигните влијанија на непријателите на слободата и демократијата, ниту да ги спречиме метастазите што продираат во кревкото ткиво на нашето општество, заклучи Грковска. мч/аа/
фото: Влада на РСМ