Делчево, 10 март 2025 (МИА) - Помеѓу 4 и 8 март делегација од градоначалници и претставници на осум општини од земјава и од Министерството за животна средина и просторно планирање беа на студиска посета во Шведска посветена на климатска акција. Учесниците, како што информираше денеска градоначалникот на Делчево Горан Трајковски, имаа средби со претставници на општините Малме и Лунд, како и со универзитетите во Малме и Лунд и имаа можност да посетат локации каде климатската акција и одржливото урбано планирање се практично применети и видливи.

-Градоначалниците и претставниците од општина Делчево, Битола, Струмица, Гевгелија, Демир Капија, Куманово, Лозово и Пласница, како и претставникот од Одделението за соработка со локалната самоуправа при Министерството за животна средина и просторно планирање ги посетија Малме и Лунд со цел да се запознаат со практичните мерки за заштита на животната средина, урбаното планирање и развој и соработката со академската заедница и граѓаните за создавање на одржливи и отпорни градови, истакна Трајковски.

Студиската посета, во организација на Еко-свест и поддршка од Шведска, како што додаде овозможи нови знаења за учесниците и ја потврди потребата од заедничка соработка и размена на податоци и научени лекции. 

-Беше евидентно дека иновацијата има движечка улога во напорите за одржливо живеење. Учесниците ја оценија посетата како корисна бидејќи им овозможи да ги прошират своите видици и да размислат како одредени практики од Шведска може да се применат и кај нас, особено во делот на учеството на јавноста во заедничкото урбано планирање, улогата на академијата и експертите во прибирањето податоци кои ќе се применат во планирањето, како и меѓусебната соработка и размена на позитивни практики, додаде Трајковски. вс/мд/

Фото: МИА