Љубљана, 26 април 2022 (МИА) - Победникот на парламентарните избори во Словенија и иден премиер Роберт Голоб најави дека во најбрз можен рок, најверојатно денеска, ќе почнат консултациите со партнерските партии за формирање влада. - Очекувам преговорите со идните коалициски партнери да започнат во вторник, изјави Голоб за словенечкото издание на порталот Н1, истакнувајќи дека неговото Движење Слобода смета на сојуз со социјалдемократите (СД) на Тања Фајон, но и со Левица на Лука Месеца. Голоб потврди дека би сакал да вклучи две партии од левиот центар во идната влада, кои не го поминаа цензусот на општите избори, а тоа се Листата на Марјан Шарец (ЛМШ) и Сојузот на Аленка Братушек (САБ). Тој посочи дека неговата цел е да формира влада од луѓе кои се професионални и квалитетни, без разлика на нивната партиска припадност. „Ние не сме класична партија, ние сме движење. Затоа немаме партиска дисциплина, ниту имаме намера да ја применуваме. Ние ги оценуваме поединците врз основа на нивната стручност и знаење. Партиското членство не е услов за добивање на функцијата, рече Голоб. паг/