Берово, 14 октомври 2024 (МИА) - Вкупно 16 ученици од угостителско – туристичката струка од гимназијата Ацо Русковски од Берово денес заминаа на двонеделна обука во Умбрија, Италија. Во периодот од 14-ти до 28 октомври, како што информираа од учичиштето, беровските гимназијалци ќе бидат дел од реализацијата на Еразмус+ проектот „Здрава исхрана за здрава тежина". 

-Заради таа цел, претходно во просториите на училиштето се одржа родителска средба во врска со реализацијата на студиското патување во Сполето, Италија. Целта на состанокот беше родителите и учениците од угостителско – туристичката струка да се запознаат со целите на проектот, програмата која што ќе ја имаат за време на двонеделниот престој во Италија, како и нивните права и обврски за време на обуката, информираа од гимназијата „Ацо Русковски". 

За реализација на оваа активност на  гимназијата претходно и беше одобрен грант за користење на средства.

-Грантот беше одобрен од Националната агенција за европски образовни програми и мобилност во рамките на програмата ЕРАЗМУС+ КА122-VET, краткорочни проекти за мобилност на ученици и вработени во стручно образование и обука, на Општинското средно училиште „Ацо Русковски“ од Берово. Грантот за користење средства е во вкупен износ од 51.992 евра, додадоа од беровското Општинско средно учичиште.

Од гимназијата очекуваат успешна реализација на активностите од проектот и збогатување на знаењата на учениците. вс/сст/

Фото: МИА