Скопје, 10 ноември 2023 (МИА) - Размена на искуства и силна поддршка доби градоначалникот на Општина Центар, Горан Герасимовски од германската амбасадорка Петра Дрекслер, за проектот за енергетска независност и самоодржливост на Општината, информираа од локалната самоуправа.

На средбата со амбасадорката, Герасимовски го презентирал проектот на „Енергија Центар“, поставувањето фотоволтаици во градинката „Раде Јовчевски - Корчагин“, во објектот „Пепелашка“. Тој информирал и за плановите да се постават фотоволтаични системи и на покривните конструкции во три основни училишта.

- Амбасадорката ги пофали напорите на општината, што се движат по зелената агенда на која се фокусира и германската Влада. Таа понуди и соработка за реализација на проекти за одржлива енергија. Германската амбасада ги поздрави проектите на Општина Центар за социјална заштита на најранливите категории граѓани, се наведува во соопштението.

Општина Центар е прва општина што формираше сопствено јавно претпријатие за производство и продажба на електрична енергија, потсетуваат во соопштението.

Герасимовски истакнал дека со реализацијата на овој проект, општината ќе биде електро-енергетски независна и во нејзиниот развој ќе се користат природните ресурси и потенцијали.

- Заштедите од пониските сметки и средствата од продажбата на вишоците електрична енергија ќе бидат искористени за нови енергетски фасади, поголемо зеленило, инфраструктурни решенија и проекти што ќе им бидат од корист на граѓаните. Станува збор за долгорочна инвестиција, не само за нас туку и за идните генерации, смета градоначалникот. бд/са/

Фото: Општина Центар