Скопје, 14 ноември 2024 (МИА) - Македонската новинарка и филмска критичарка Гена Теодосиевска оваа година ќе биде член на официјалното жири за најдобар холандски филм во рамките на 37. Меѓународен фестивал на документарен филм во Амстердам (IDFA), на покана на уметничкиот директор Орва Нирабија. Фестивалот се одржува од 14-24 ноември. 

Таа во соработка со Амбасадата на Кралството Холандија ја иницираше Неделата на современиот Холандски филм во 2012 година, а во 2015 година заедно со Маријке Рави во просториите на Амбасадата ја органзираше и учествуваше во туторинг сесиите на пет сценарија на филмски автори од Македонија.

Позната како искусен ТВ новинар, критичар, фестивалски селектор и познавач на филмските состојби, Теодосиевска беше селектор, уметнички директор и директор на ИФФК „Браќа Манаки“ (2008-2020), а од 2022-2024 година е назначена за уметнички директор на ИФФ „Киненова“. Како продуцент се појавува во 23 кратки видео дела во продукција на МТВ, а беше извршен продуцент на филмот „Судијата“, прикажан на над 30-тина филмски фестивали низ светот, вклучително премиерно и на Венециската филмска Mostra во 2001 година.

Во последниве три и пол децении таа е посветен проследувач филмската уметност, туторинг експерт за документарен и краток филм на неколку европски филмски работилници, и промотор на македонскиот филм на меѓународната сцена.

За член на жири била поканета на повеќе од 30-тина меѓународни филмски фестивали. М-р Гена Теодосиевска е активен член на Македонската секција на Fipresci, и EWA, а вработена е во МРТ.бт/са/