Манчестер, 1 април 2025 (МИА) – Напаѓачот на Манчестер Сити, Ерлинг Халанд, според проценката на лекарите ќе биде надвор од терените „пет до седум недели“ поради повреда на зглобот, изјави денеска тренерот Пеп Гвардиола.
Халанд го повреди левиот скочен зглоб во неделата на натпреварот од ФА Купот против Бурнмаут, откако го постигна својот 30 гол сезонава во сите натпреварувања.
„Лекарите ми кажаа меѓу пет и седум недели, па се надевам дека ќе биде подготвен за крајот на сезоната и Светското клупско првенство, одговори Гвардиола на новинарско прашање колку долго ќе отсуствува 24-годишниот Норвежанец од фудбалските терени.
Според проценката направена во вторникот, Халанд би можел да биде подготвен за финалето на ФА Купот на 17 мај доколку неговиот тим успее да го елиминира Нотингем Форест во полуфиналето на крајот на април.
Неговото продолжено отсуство е голем удар за актуелниот четирикратен шампион на Англија кој сè уште не обезбедил пласман во следната ЛШ. Само најдобрите четири премиерлигашки тимови ќе обезбедат место следната сезона во Лига на шампиони, а Манчестер Сити во моментов е петтопласиран на табелата, бод зад четвртопласираниот Челзи, пред да му гостува на Лестер в среда и да се соочи со градскиот ривал Манчестер Јунајтед, в недела. ег
ФОТО: ЕПА