Габриел: Приемот на Бугарија и Романија во Шенген е успех што ќе придонесе за развој на целиот регион и Европа
- Приемот на Бугарија и Романија во Шенген е значаен заеднички успех кој ќе придонесе за подобрување на одржливоста и позитивниот развој на целиот регион и Европа. Ова го изјави бугарската вицепремиерка и министерка за надворешни работи Марија Габриел во МНР по средбата со министерката за надворешни работи на Романија Луминика Одобеску.
![Габриел: Приемот на Бугарија и Романија во Шенген е успех што ќе придонесе за развој на целиот регион и Европа](https://new.mia.mk/index.php/images/20240205152601_big_730x400_7.webp )
Софија, 5 февруари 2024 - Приемот на Бугарија и Романија во Шенген е значаен заеднички успех кој ќе придонесе за подобрување на одржливоста и позитивниот развој на целиот регион и Европа. Ова го изјави бугарската вицепремиерка и министерка за надворешни работи Марија Габриел во МНР по средбата со министерката за надворешни работи на Романија Луминика Одобеску.
Ова е веста на денот од Република Бугарија, избрана на Бугарската телеграфска агенција (БТА) за објавување од МИА, согласно Договорот за размена на информации и професионална соработка, кој предвидува секој ден националните информативни агенции на Северна Македонија и Бугарија да разменуваат директно избрана од другата агенција вест на денот на соодветната земја, а другата агенција да ја објави на својот интернет сајт без промени со изрично посочување и цитирање на партнерот како извор.
Одобеску е во посета на Бугарија на покана на Марија Габриел. Двете први дипломатки имаа билатерална средба за актуелни прашања од билатерален и меѓународен интерес, по што следеа пленарни разговори меѓу двете делегации.
Според Габриел, прифаќањето на двете земји во Шенген е резултат и на добрата соработка меѓу двете држави. Таа наведе дека заедничките напори ќе продолжат активно и оваа година, за што поскоро земјите да постигнат датум за укинување на проверките и на копнените граници во контекст на членството во Шенген. „Бугарија и Романија докажаа дека со заеднички, добро координирани напори можеме да постигнеме значајни цели“, нагласи Габриел.
Таа истакна дека ова е прва официјална посета на романски министер за надворешни работи на Бугарија по повеќе од десет години и посочи дека Романија е стратешки партнер на Бугарија. „Со години нашите земји споделуваат не само заеднички цели, туку и заеднички успеси, тоа ја прави нашата соработка уште позначајна - и за нашите две земји и за регионот, за ЕУ и НАТО“, додаде Габриел.
„Активните билатерални односи меѓу Бугарија и Романија се засноваат на добрососедство, заеднички европски и евроатлански вредности и заеднички интерес“, истакна Габриел. Таа нагласи дека во март се одбележува годишнината од потпишувањето на декларацијата за стратешко партнерство меѓу двете земји. „Нашата посветеност е да работиме заедно за поврзување - во науката, во образованието, во енергетиката, во технологијата и иновациите, за заедно да обезбедиме поодржлив развој на Југоисточна Европа“, рече Габриел.
Вицепремиерката и министерка за надворешни работи посочи дека на средбата акцент бил ставен на изградбата на транспортниот коридор „Север-Југ“, поврзувањето на транспортната инфраструктура и диверзификацијата на изворите на енергија. „Во изминатите месеци ги обединивме и ги интензивиравме напорите за реализација на важни инфраструктурни проекти како што е изградбата на нов мост на Дунав“, рече Габриел.
Таа посочи дека е воспоставена соработка и во областа на иновациите и дигитализацијата и потсети дека минатата година во октомври беше потпишан меморандум во оваа област. „Верувам дека Бугарија и Романија во контекст на европските долини на иновации можат да бидат лидер и пример за добри практики“, рече Габриел.
„Подготвени сме да продолжиме да го споделуваме нашето искуство и да ги интензивираме нашите напори за заеднички и брз напредок во процесот на пристапување кон Организацијата за економска соработка и развој (ОЕЦД)“, додаде вицепремиерката и министерка за надворешни работи. Таа посочи дека членството на Бугарија и Романија во ОЕЦД ќе придонесе за подобрување на економската стабилност, инвестициската клима и животниот стандард во регионот на Југоисточна Европа.
Габриел истакна дека Бугарија и Романија имаат заедничка одговорност за одржување на мирот и безбедноста во регионот на Црното Море и додаде дека двете земји, како сојузници на НАТО, ќе продолжат да ја нагласуваат важноста на регионот. „Пример за нашата успешна соработка на полето на безбедноста беше формираната заедничка работна група против мини во Црното Море меѓу Бугарија, Романија и Турција“, истакна Габриел.
„Стратешкото значење на нашиот црноморски регион е препознаено и најде свое место во стратешкиот концепт на Алијансата. Верувам дека заедно ќе продолжиме да го пополнуваме со содржина и заедно ќе продолжиме со нашите напори за подобрување на нашата отпорност против хибридните закани, заштитата на критичната инфраструктура и спротивставувањето на дезинформациите“, додаде Габриел.
Средбата со романската колешка, како и односите меѓу Бугарија и Романија, таа ја дефинира со три клучни зборови - „соработка, врска, безбедност“.
„Тоа го даваат Бугарија и Романија на Југоисточна Европа, на граѓаните на нашите земји, но и на ЕУ и НАТО“, рече Габриел.
Медиумската информативна агенција овие текстови ги објавува во оригинална форма, согласно Договорот за размена на информации и професионална соработка меѓу двете национални новински агенции МИА и БТА