Белград, 29 август 2024 (МИА) - Претседателот на Србија, Александар Вучиќ, зборуваше на прес-конференција по средбата со претседателот на Франција, Емануел Макрон, каде што ги објасни деталите од состанокот и договорите што беа потпишани.

На почетокот на конференцијата, Вучиќ изјави дека разговорот бил долг.

- Имавме долги разговори и ќе продолжиме со нив до доцна во ноќта. Разговаравме за сите важни стратешки прашања, како билатералната соработка, така и за нашиот пат кон ЕУ и стратешките односи во светот и Европа. Му се заблагодарив за поддршката што Франција ја пружа на европскиот пат на Србија, но исто така сум благодарен за сè поголемите инвестиции и сè поголемата соработка што ја имаме во различни сфери на животот, наведе Вучиќ. Едно од прашањата за кои се разговараше беше и нуклеарната енергија.

- Србија за 10 години нема да има доволно електрична енергија ако не користи нуклеарна енергија. Во тоа вложуваат многу земји од ЕУ и учат од францускиот пример. Тие 70 отсто од енергијата ја добиваат преку нуклеарни реактори. Станува збор за чиста енергија, истакна претседателот на Србија.

Потоа се осврна на најважниот дел од средбата.

„Големата вест е купувањето на Рафал авиони. Ќе видите, ќе бидеме сосема отворени. Договорот е потпишан со логистички пакет. Од резервни мотори до сè друго. Вкупната вредност е 2,7 милијарди евра. Дванаесет сосема нови авиони ќе бидат во сопственост на Србија. Ова е огромна вест и ќе значително ќе придонесе на оперативните способности на нашата армија. Благодарност до Макрон што ни овозможи да купиме нови Rafale авиони и веруваме дека тоа не беше лесно. Веруваме и во добра соработка на нашите армии во иднина. Во 2024 и 2025 година ќе исплатиме по 15 отсто од буџетот, по 421 милион евра. Нема да го зголемиме уделот на јавниот долг во БДП на Србија, порача тој.

На крајот, Вучиќ рече дека разговарале и за ситуацијата во Европа и регионот.

- Мене не ми е срам, за разлика од многумина, да зборувам отворено и искрено со Макрон. Тој е еден од луѓето кои може да слушне различно мислење и мислам дека е важно да дојдеме до мир што побрзо. Изразив желба ситуацијата во регионот да биде целосно стабилна и сигурна. Верувам дека ќе имаме значајна поддршка од Франција во ова прашање, заклучи Вучиќ. ссм/

фото: ЕПА