Штип, 22 септември 2023 (МИА) - Центарот за култура „Ацо Шопов“-Штип утре и официјално ќе го означи ставањето во функција на првата фотонапонска  централа на кровната конструкција на една институција од областа на културата, информираше на денешната прес-конференција директорот на Центарот за култура „Ацо Шопов“-Штип, Горан Трајков.

Тој истакна дека на проектот се работело две години и е реализиран преку јавно-приватно партнерство. Пред да се постават фотоволтаиците се реконстрираше кровната конструкција на зградата на Центарот за култура „Ацо Шопов“, кој со години протекуваше.

-Фoтонапонската централа е со моќност од 240 киловати на час, што значи во просек би произведувала по еден мегават на ден, а можеби и повеќе, бидејќи нашето поднебје е доста сончево и се надеваме дека ќе имаме и поголемо производство. Тоа значи дека ќе имаме и поголем влез на средства кои ќе се искористат за различни цели за Центарот, вели Трајков.

По тој повод Центарот за култура „Ацо Шопов“ викендов ќе има и дводневна културно-уметничко програма под мотото „Енергијата е иднината“. Ликовни работилници, музички групи и ди џеи ќе има на сцената пред платото на Центарот за култура. Во рамките на оваа програма ќе биде и караванот под мотот  „Тоше за овој свет“. Во Центарот за култура ќе бидат изложени и лични предмети на нашата музичка легенда Тоше Проески. вдј /цр

Фото: МИА