Дебар, 21 мај 2024 (МИА) - Во насока на подобрување на условите за живот и создавање соодветен простор каде граѓаните ќе може да одмораат, во тек на реализација се неколку зафати од страна на локалната власт на Дебар.

- Еден од нив е уредување и чистење на градскиот парк во центарот на градот. Сосема поинаква средина ќе се создаде со  осветлувањето во внатрешноста на паркот. Овој проект ќе продолжи и во другите делови, рече градоначалникот Хекуран Дука кој го следеше текот на работите.

Бараме, апелираше тој,  секој граѓанин повеќе да се грижи за одржувањето на паркот, да не се фрла отпад и паркот да биде душата на центарот на градот како и катче за одмор и рекреација.

Дука изврши увид и во текот на работите околу пополнувањето на ударните дупки на главната улица во центарот на градот.

-Со проектот за санација на ударните дупки и нивелирањето на шахтите ќе бидат опфатени не само главните улици, туку и улиците во сите населби во градот. Со тоа ќе се  овозможи подобра фреквенција и побезбедно движење, нагласи тој, задоволен од текот и квалитетот на работите.

Деновиве просторот кај споменикот на Паднатите борци од Дебар и Дебарско во НОВ, како и  кружните текови се хортикултурно уредени. Исто така беа исчистени од отпад детското и другите спортски игралишта.

Дука посочи дека паралелно со овие зафати продолжува, според зацртаната динамика, изградбата на  паркинг просторот во селото Горно Косоврасти со површина од 240 квадратни метри.

Ова е прв ваков простор во ова село со над илјада жители.

Општина Дебар, најави Дука, ќе продолжи да подготвува проекти и ќе вложува напори во соработка со централната власт и други институции, за обезбедување средства за нивна реализација, со цел обезбедување на потребните инфраструктурни и други услови. вт/дма/

Фото: МИА