Во Русија и Казахстан евакуирани над 100.000 лица поради големите поплави
- Големите поплави им се заканија на многу населени места во планината Урал, во Сибир, како и Казахстан, во близина на реките Урал и Тобол, за кои локалните власти соопштија дека за неколку часа го зголемија ниво на вода на највисоките нивоа досега.
![Во Русија и Казахстан евакуирани над 100.000 лица поради големите поплави](https://new.mia.mk/index.php/images/20240410121739_big_730x400_47.webp )
Москва, 10 април 2024 (МИА) - Русија и Казахстан наредија евакуација на повеќе од 100.000 лица по брзото топење на снегот што придонесе за надоаѓање на реките и доведе до нивно излевање и најголемите поплави во областа во последните 70 години.
Големите поплави им се заканија на многу населени места во планината Урал, во Сибир, како и Казахстан, во близина на реките Урал и Тобол, за кои локалните власти соопштија дека за неколку часа го зголемија ниво на вода на највисоките нивоа досега.
Урал, третата по големина река во Европа, која тече низ Русија и Казахстан и се влева во Каспиското Езеро, во петокот ја проби браната на насипот, поплавувајќи го градот Орск, јужно од Урал.
Низводно, зголемено е нивото на вода во Оренбург, град со околу 550.000 жители.
Сирените во Курган, град на реката Тобол, притока на Иртиш, ги предупредија луѓето веднаш да се евакуираат.
Вонредна состојба е прогласена и во Тјумен, главниот регион за производство на нафта во Западен Сибир, најголемиот базен со јаглеводороди во светот.
- Допрва претстојат тешки денови за регионите Курган и Тјумен, изјави портпаролот на Кремљ, Дмитриј Песков, додавајќи дека „доаѓа многу вода“.
Претседателот Владимир Путин разговараше со Касим-Жомарт Токаев, претседателот на Казахстан, каде што повеќе од 86.000 лица веќе се евакуирани поради поплавите. Токаев оцени дека поплавите се најголемите во последните 80 години.
Најпогодени се областите Атирау, Актобе, Акмола, Коштанај, Источен Казахстан, Северен Казахстан и Павлодар, од кои повеќето се граничат со Русија и ги пресекуваат реки што потекнуваат од Русија, како што се Урал и Тобол.
Во Русија, гневот на граѓаните е на врвот во градот Орск, каде дел од луѓето побараа помош од Кремљ, исфрлајќи бран критики за локалните власти.
Кремљ соопшти дека Путин бил информиран за ситуацијата, но дека нема план да ја посети поплавената зона, бидејќи локалните власти и службениците за вонредни состојби даваат се од себе за да се справат со поплавите. сд/
фото:МИА архива