Мадрид, 23 јуни 2024 (МИА) - Реал Мадрид не е загрижен за скршениот нос на Килијан Мбапе. Според „As“, клубот ја разбира одлуката за одложување на операцијата на носот до крајот на Европското првенство и ја прифаќа мирно, без да поставува никакви барања ниту кон француската федерација, ниту кон фудбалерот. 

Во Мадрид им веруваат на лекарите на францускиот тим, загриженоста може да се појави само ако Французите стигнат до финалето на турнирот. Тогаш операцијата ќе треба да се одложи за втората половина на јули, што ќе го одложи процесот на закрепнување.

Шпанците очекуваат дека официјалното деби на напаѓачот за клубот ќе го има на 14 август на натпреварот од Суперкупот на УЕФА против Аталанта. 

Финалето на ЕП 2024 ќе се одржи на 14 јули.

Медицинските експерти уверуваат дека рехабилитацијата на општа скршеница трае најмалку три недели, а за целосно закрепнување од четири до пет. Сепак, многумина сметаат дека капитенот на француската репрезентација не доживеал сериозна скршеница, туку тешко поместување за кое не бил потребен цел месец за опоравување.

Што се однесува до претставувањето на Мбапе на „Сантијаго Бернабеу“, тоа во секој случај ќе се случи пред операцијата, бидејќи скршеницата не е многу забележлива визуелно. Датумот ќе биде финализиран во зависност од крајот на францускиот настап на Евро. зс/

Фото: ЕПА