Во Прилеп се вапсаа црвените велигденски јајца и се даруваа штитениците во Домот за стари лица
- Повеќе од 130 вапсани црвени велигденски јајца жените од Здружението „Преродба“ им подарија на штитениците од Домот за стари лица „Киро Крстески – Платник“ во Прилеп. Ги посетија штитениците, а претходно заедно со најмладите во градинката Гоце Делчев“ вапсуваа велигденски јајца и им ги објаснуваа обичаите.
![Во Прилеп се вапсаа црвените велигденски јајца и се даруваа штитениците во Домот за стари лица](https://new.mia.mk/index.php/images/20240502134250_big_730x400_38.webp )
Прилеп, 2 мај 2024 (МИА) - Повеќе од 130 вапсани црвени велигденски јајца жените од Здружението „Преродба“ им подарија на штитениците од Домот за стари лица „Киро Крстески – Платник“ во Прилеп. Ги посетија штитениците, а претходно заедно со најмладите во градинката Гоце Делчев“ вапсуваа велигденски јајца и им ги објаснуваа обичаите.
-Велигденските јајца ги вапсавме во Здружението и им ги дарувавме на штитениците од Домот. Тоа е наша традиција. А голема традиција е што со најмладите на Велики четврток вапсуваме јајца. Атмосферата беше многу убава во градинката, децата веќе знаеја за вапсувањето јајца, им објасниле многу учителките, ама беа љубопитни и имаа многу прашања. И песничка ни запеаја. Тоа е најголема радост за нас, рече Лилјана Ацеска од Здружението „Преродба“.
Рано изутрината прилепчанки пред изгрејсонце ги вапсаа првите велигденски јајца. Ги ставија крај прозорецот првите сончеви зраци да ги угреат. Првото јајце се чува цела година до наредниот Велигден.
-Подготовките за најрадосниот празник се при крај. Денес се вапсаа јајцата, им поминавме на дечињата по лицето со црвено јајце велејќи: „Црвено, здраво, дебело“. Таков е кај нас адетот. Утре е најтажниот ден, ќе одиме в црква. В сабота ќе ги направиме последните подготовки во домот за велигденската трпеза на која ќе се собере целото семејство. В сабота на полноќ пред црка ќе го пречекаме Христовото воскресение и ќе се скршиме со велигденските јајца. В недела во Прилеп е традиција дечињата, променети во ново, со родителите да ги посетат роднините и пријателите и на дар ќе добијат велигденско јајце и по некоја паричка, ги објаснува Ацеска обичаите за Велигден во Прилеп. ем/мд/
фото: МИА