Во пресрет на Денот на шегата, дефиле на најмалите од Делчево, Берово и Македонска Каменица
Делчево, 31 март 2023 (МИА) - Во пресрет на 1 април - Денот на шегата, денеска во Делчево, Берово и Македонска Каменица околу петстотини деца со маски продефилираа по улиците.
Обединети во „Априлијадата“ во Делчево како плод на детската фантазија и соништа продефилираа принцези, пчели, самовили, најразлични животни и ликови од детските бајки.
-Годинава домаќини на „Априлијадата“ во Делчево беа ученици од ООУ „Ванчо Прке“, а освен учениците од ова училиште свој настап имаа и ученици од ООУ „Св.Климент Охридски“ и дечињата од детската градинка „Весели цветови“, информираа од Општина Делчево од каде информираа дека настанот се реализираше со поддршка на НУ Центар за култура „Н.Ј.Вапцаорв и Јавната локална библиотека „Илинден“.
Во Берово најмалите под маските на своите јунаци, најмалите продефилираа на плоштадот ,,Димитар Беровски”.
-На детските лица можеше да се види многу среќа и еуфорија, а плоштадот во Берово, беше преполн, од весели родители, роднини и минувачи. Со јасна порака, да нема повеќе маски кај возрасните, за поубав и посреќен свет на децата, тие расположени мавтаа со рацете и уживаа во традиционалното дефиле, велат од Општина Берово.
Детска смеа, преубави маски и костими ги исполнија и улиците во Македонска Каменица. Каменичките дечиња, како што информираа од Општина Македонска Каменица беа дел од годинешната Априлијада и ги воодушевија каменичани.
Во општините од Пијанечко-Малешевскиот регион за утре е закажано Првоаприлско дефиле и во Општина Пехчево. вс/дма/
Фото: МИА
