Во Општина Струмица е извршено социјално мапирање за деца и лица со попреченост
- Во Струмица има голем процент на лица со попреченост кои се соочуваат со бариери, а претставниците на организациите на овие лица како најголеми проблеми ги истакнаа личните асистенти, недости
![Во Општина Струмица е извршено социјално мапирање за деца и лица со попреченост](https://new.mia.mk/index.php/images/20221113144618_big_730x400_94.webp )
Струмица, 30 мај 2022 (МИА) - Во Струмица има голем процент на лица со попреченост кои се соочуваат со бариери, а претставниците на организациите на овие лица како најголеми проблеми ги истакнаа личните асистенти, недостиг од дневни центри, достапноста во станбените единици и во домовите и тие побараа овие проблеми да влезат во документите на Општината за подобрување на состојбата на овие лица.
Според Боран Иваноски од Мрежа на асоцијации на локални власти од Југоисточна Европа-НАЛАС, кризата најмногу ги погодува токму ранливите категории и затоа грижата треба да дојде од локалната самоуправа.
-Во услови на криза се зголемува притисокот врз локалната самоуправа да се згрижат овие лица и тука се обврскитре на локалните власти кои имаат надлежности што треба да ги исполнат. Општина Струмица го препознава социјалното мапирање и користа од еден таков документ е голема затоа што социјалното мапирање е основа за креирање на локалните политики за оваа целна група, рече Иваноски.
Градоначалникот Костадин Костадинов во обраќањето истакна дека Струмица е општина во која максимално се вложува за живот без бариери и еднакво за сите.
-Влогот е препознат и Струмица е една од петте општини во државата во која е извршено социјално мапирање за деца и возрасни лица со попреченост. Сите наоди ќе ги интегрираме во стратешките и акциските документи во областа на социјалната заштита и во останатите локални политики. Со тоа ќе го зајакнеме создавањето средина еднаква за сите, еднакви можности за лицата со попреченост, како и поттикнување на развојот и искористување на нивните потенцијали, знаења, способности и вештини, рече Костадинов.
Денешната дискусија за нацрт-извештајот од социјалното мапирање на состојбата и потребите на лицата со попреченост во Општина Струмица се организираше во рамки на проектот „Зајакнување на локалните капацитети за спроведување на Агенда 2030 и принципот никој да не биде изоставен“, имплементиран од ЗЕЛС и НАЛАС-Мрежа на асоцијации на локални власти од Југоисточна Европа во соработка со GIZ во име на Германското федерално министерство за економска соработка и развој. рт/мд/