Рим, 10 април 2020 (МИА) - Почнати се истраги за стотици смртни случаи од коронавирусот во домови за нега на стари лица во Милано и во целиот регион Ломбардија, јавија италијански медиуми. Повикувајќи се на извор од судството, тие наведуваат дека истрагата не е насочена во овој момент против ниту една личност, а се спроведува и во други градови, како што е Бергамо. Истрагата треба да утврди постоење можни кривични дела, како што е несовесно убиство. Од средината на март, домовите за нега на стари лица станаа главна причина за загриженост, особено кога здравствените работници и семејствата во Ломбардија започнаа да пријавуваат смртни случаи на жители кои не биле тестирани за коронавирусот. Неименуван извор вели дека истрагата се фокусира на одредбата од 8 март со која властите во Ломбардија побарале од локалните домови за нега на стари лица да преземат пациенти отпуштени од болница во обид да ослободат пренатрупани болнички одделенија. Некои лекари и медицински сестри рекле дека заразата се ширела бидејќи домовите во тоа време немале соодветна заштитна опрема.