Багдад, 18 ноември 2023 (МИА) – Во Ирак се гласа на првите избори за локалните совети во последната деценија, при што владејачката алијанса на шиитски муслимани веројатно ќе ја прошири својата моќ поради бојкотот на популистичкиот свештеник Моктада ал-Садр, неговиот главен политички ривал.

Изборите го отвораат патот за парламентарните избори закажани за 2025 година, што ќе ја одредат рамнотежата на силите во земјата каде што групите поврзани со Иран во последните неколку години остварија политички придобивки.

Локалните избори последен пат беа одржани во 2013 година, а во меѓувреме беа одлагани поради војната против милитантите на Исламската држава, кои зазедоа големи делови од Ирак, но на крајот беа поразени.

Шиитските ривали на Садр, кои го блокираа неговиот обид да формира влада откако излезе како победник на парламентарните избори во 2021 година, најверојатно ќе ја преземат контролата врз повеќето локални совети, особено во јужните провинции, кои главно се населени со шиити.

Ова дополнително ќе ја зајакне позицијата на владејачката шиитска алијанса блиска до Иран, позната како Координативна рамка, продлабочувајќи ја нејзината моќ преку пристап до нафтеното богатство на државата, што може да се троши на локални проекти и услуги.

Алијансата веќе беше најголемиот поединечен блок во парламентот откако членовите на партијата на Садр се повлекоа од неговата работа.

Во 15 од 18 ирачки провинции се одржува гласање за избор на 285 членови на советот, чии должности вклучуваат назначување моќни провинциски гувернери и надзор на локалната власт.

Изборите во полуавтономниот регион Курдистан во Ирак, кој опфаќа три провинции, треба да се одржат следната година. сд/

фото: ЕПА