Дебар, 2 ноември 2021 (МИА) - Расте интересот за трета доза вакцина против Ковид-19 меѓу жителите на општините Дебар и Центар Жупа, која само денеска е аплицирана кај 64 лица, изјави за МИА Баки Алили, директор на дебарската Општа болница со проширена дејност. -Секојдневно расте бројот на оние кои доаѓаат во вакциналниот пункт, кој функционира во модуларната болница, сместена во дворот на нашата установа. Трета доза до сега е аплицирана кај над 240 граѓани од двете општини, а само денес кај 64. Сите тие примаат вакцина „Фајзер“. Имаме доволни количини и затоа апелирам до сите на кои им се дава ваква можност да ја искористат, бидејќи само на тој начин ќе обезбедиме колективен имунитет, рече Алили. Наспроти тоа, додава тој, видно е намален бројот на оние кои се јавуваат за прва доза, што можеби е разбирливо ако се има предвид процентот на вакцинирани со бројот на резидентното население. Во општините Дебар и Центар Жупа со две дози имунизирани се над 8.300 граѓани. Во вакциналниот пункт во Дебар две дози примиле над 7.100, додека над 1.200 лица се имунизирани во пунктови во Скопје и Охрид. вт/мд/