Тирана, 16  септември 2023 (МИА) – Албанскиот премиер Еди Рама објави дека денеска почна аплицирањето за добивање бескаматни кредити за решавање на станбеното прашање на млади лекари, полициски и армиски службеници.

Тоа е во рамки на владината програма со цел да им го олесни решавањето на станбеното прашање. Годинашната квота е вкупно 300 лица, односно по 100 од секој сектор, а следните години се очекува бројот да биде поголем.

Корисниците се избираат врз основа на систем на бодување, а во случај да има повеќе кандидати со еднакви бодови од дефинираните квоти, нивниот избор ќе се изврши според системот на бодување утврден од самата институција-корисник. Главен услов е подносителите на барањата да се во брак.

- Добра вест. Денеска започнува програмата за бескаматни станбени кредити за млади лекари, полицајци и војници. Едноставните чекори за аплицирање во е-Албанија во следните 30 дена овозможуваат брз и транспарентен процес за пристап до оваа нова програма. Полза ќе имаат 300 вработени во државната полиција, вооружените сили и лекарите-младите семејства од овие три категории, напиша Рама на Фејсбук.

За спроведување на оваа владина мерка се задолжени Министерството за финансии и економија, Министерството за здравство и социјална заштита, Министерството за внатрешни работи и Министерството за одбрана. вт/паг/

Фото: Еди Рама ФБ