Вонреден виртуелен самит на земјите од АПЕК за справување со делта сојот на Ковид-19
- Лидерите на земјите од Организацијата за азиско-пацифичка економска соработка (АПЕК) денеска одржаа виртуелен самит посветен на снабдувањето со вакцини против Ковид-19 за борба против глобалн
![Вонреден виртуелен самит на земјите од АПЕК за справување со делта сојот на Ковид-19](https://new.mia.mk/index.php/images/20221107232703_big_730x400_54.webp )
Вашингтон, 16 јули 2021 (МИА) - Лидерите на земјите од Организацијата за азиско-пацифичка економска соработка (АПЕК) денеска одржаа виртуелен самит посветен на снабдувањето со вакцини против Ковид-19 за борба против глобалната пандемија.
На самитот, меѓудругите, учествуваа и американскиот претседател Џо Бајден, рускиот лидер Владимир Путин и претседателот на Кина, Си Џинпинг.
Во заедничкото соопштение по виртуелната средба, која беше под модераторство на Нов Зеланд, лидерите на најголемите земји во азиско-тихоокеанскиот регион изјавија дека поддржуваат доброволно предавање на технологија за производство на вакцини „на заемно согласни услови“. Ова е со цел да се спречи ширењето на новата делта мутација на вирусот во повеќе земји од регионот.
- Пандемијата продолжува да влијае уништувачки врз населението и економијата на нашиот регион. Ние можеме да ја надминиме оваа вонредна ситуација во областа на здравството само со засилување на праведен пристап до безбедни, ефективни, квалитетни и достапни вакцини против Ковид-19, се вели во заедничката изјава.
Изјавата доаѓа и покрај тоа што меѓу некои членки на АПЕК постојат тензии поради потеклото на првичната епидемија на коронавирусот, трговски прашања, репресиите на населението во Синцзјан и Хонгконг, како и територијални спорови во Јужното Кинеско Море.
Висок претставник на администрацијата на Бајден изјави дека претседателот планира да го искористи форумот за демонстрација на својата подготвеност за слободен и отворен индо-пацифички регион. кб/