Дебар, 17 јуни 2024 (МИА) - Водата во Дебарско Езеро може слободно да се користи за капење и рекреација, објави попладнево Општина Дебар.

- Врз основа на последните примероци земени од Дебарското Езеро од Центарот за јавно здравје (ЈЗУ) – Охрид, од микробиолошките анализи, во експертското мислење стои дека според испитуваните параметри на езерската вода а според (Сл.Весник на РМ бр. 129/2016), класификацијата е
оценета како одлична, стои во објавата.

Според Уредбата за класификација на водите, пак, испитувањето на параметрите од хемиската анализа одговараат на прва класа.

-Резултатите се однесуваат само на испитуваните примероци од  езерска вода. Водата може да се користи за капење и рекреација како и за спортови на вода, се наведува во објавата. 

Центарот за јавно здравје од Охрид редовно врши анализа на езерската вода, на примероци земени на неколку места, од Косоврашки Мост до месноста "Три чешми"(Манастирец).

Почести се анализите на водата кај градската плажа, каде во летната сезона се разладуваат со стотици капачи.

И во изминатите години анализите потврдуваа дека водата може да се користи за капење и рекреација. вт/сст/

Фото: МИА