Скопје, 17 октомври 2023 (МИА) - Владата на денешната седница донесе Одлука за почнување постапка за избор на универзален снабдувач со електрична енергија. Универзалниот снабдувач ќе биде должен да врши снабдување со електрична енергија на домаќинствата и малите потрошувачи кои се наоѓаат на подрачјето на кое има обврска да обезбеди универзална услуга и кои избрале да бидат снабдувани од него, во согласност со обврските утврдени со Законот за енергетика и правилата за снабдување.

Како што соопшти владината прес-служба, универзалниот снабдувач, согласно законот, ќе биде должен да обезбеди универзална услуга за период не подолг од пет години.

Во следниот период, ќе се подготвува тендерската документација и јавниот повик со цел заштита на интересите на граѓаните и малите потрошувачи.

-Изборот на универзален снабдувач е во согласност со Законот за енергетика, заради остварувањето на правото на домаќинствата и малите потрошувачи поврзани на електроенергетскиот систем на универзална услуга во снабдувањето со електрична енергија, потсетува Владата. мч/лв/

фото: МИА архива