Ерусалим, 6 март 2025 (МИА) - Израел планира да преземе директна контрола врз целата хуманитарна помош што влегува во Појасот Газа и се дистрибуира до Палестинците во енклавата, објави денеска Вашингтон пост.

Според израелскиот план, само една влезна точка од Израел во Газа, Керем Шалом, ќе остане отворена за влез на помош. Се наведува дека израелските војници ја проверуваат целата стока и ја насочуваат кон „логистичките центри“ основани од Израел, со можност за обезбедување приватни изведувачи, изјавија за Вашингтон пост претставници од пет големи хуманитарни организации и Обединетите нации.

Израел, исто така, ќе воспостави систем за следење за сета дистрибуција на помош и ќе бара проверка на позадината на вработените кои дистрибуираат хуманитарна помош. Новите правила беа наведени од COGAT, единицата на израелското Министерство за одбрана која ги координира цивилните прашања на окупираните територии, на состаноците минатата среда и четврток, пишува весникот.

Хуманитарните организации предупредија дека тоа дополнително ќе ја влоши ситуацијата во Појасот Газа, особено откако Израел во саботата го запре протокот на помош во енклавата.

Израелскиот премиер Бенјамин Нетанјаху неодамна изјави дека Тел Авив го прифатил планот на американскиот пратеник Стив Виткоф за продолжување на примирјето во Појасот Газа за 42 дена, што Хамас го отфрли, велејќи дека Израел се обидува да ја одложи втората фаза од договорот. паг/

Фото: МИА архива