Битиќи во Њу Џерси: Државната поддршка за инвестиции е потпора и за пазарните успеси на македонските компании во САД
- Заменикот на претседателот на Владата на Република Северна Македонија, задолжен за економски прашања, координација на економските ресори и инвестиции, Фатмир Битиќи, заедно со претседателот на државата Стево Пендаровски, во рамки на работната посета на САД, по повод учество на Генералното собрание на ОН, ја посетиле компанијата „Фаст Пак Трејдинг“, во сопственост на Иванчо Ивановски, основана пред 30 години, а која врши дистрибуција на над 1.000 различни македонски производи во сите сојузни држави на САД.
![Битиќи во Њу Џерси: Државната поддршка за инвестиции е потпора и за пазарните успеси на македонските компании во САД](https://new.mia.mk/index.php/images/20230922123146_big_730x400_77.webp )
Скопје, 22 септември 2023 (МИА) - Заменикот на претседателот на Владата на Република Северна Македонија, задолжен за економски прашања, координација на економските ресори и инвестиции, Фатмир Битиќи, заедно со претседателот на државата Стево Пендаровски, во рамки на работната посета на САД, по повод учество на Генералното собрание на ОН, ја посетиле компанијата „Фаст Пак Трејдинг“, во сопственост на Иванчо Ивановски, основана пред 30 години, а која врши дистрибуција на над 1.000 различни македонски производи во сите сојузни држави на САД.
При обиколката на дистрибутивниот центар на компанијата во Њу Џерси, како што соопштија денеска од владиниот прес-центар, вицепремиерот Битиќи, ја истакнал заложбата на Владата за негување и развивање на контактите со дијаспората, посебно во насока на унапредување на економските врски и создавање на стимулативни услови кои мотивирачки би делувале, Северна Македонија да ја препознаат како реална можност за развивање на нивниот бизнис.
Вицепремиерот Битиќи изразил задоволство што компанијата „Фаст Пак Трејдинг“ е пример за тоа како еден бизнисмен од македонската дијаспора може да придонесе во развивањето и унапредувањето на економските врски помеѓу САД и Северна Македонија, особено од фактот што сите добавувачи на компанијата „Фаст Пак Трејдинг“ се од Северна Македонија.
- Задоволство е да се види како успесите кои се остваруваат на американскиот пазар од над 300 милиони потрошувачи во целост се засноваат на потенцијалите на стопанството во Северна Македонија. Уште повеќе радува фактот дека пазарниот успех е споделен со компании од Северна Македонија, чии производи, благодарение на претприемачките способности на г-нот Ивановски, завршуваат на пазарот во САД. Ова зборува дека во нашето стопанство имаме компетитивни компании способни да испорачаат конкурентни производи и во најсилната економија во светот. Успесите на „Фаст Пак Трејдинк“ се потврда и за ефективните политики на Владата за поддршка на инвестициите, затоа што дел од добавувачите во Северна Македонија финансиски се поддржани преку Законот за финансиска поддршка на инвестициите, рекол вицепремиерот Битиќи, по обиколката на еден од дистрибутивните центри на компанијата.
Изразувајќи честитки за успесите на компанијата, се наведува во соопштението, вицепремиерот Битиќи на сопственикот Ивановски му порачал своето претприемачко знаење да го пренесе во Северна Македонија и со тоа уште подлабоко да се вклучи во градењето на економскиот развој на земјата и зголемувањето на благосостојбата на граѓаните, за што од Владата може да очекуваат силна партнерска поддршка. цр/ац/
Фото: Влада на РСМ