Тирана, 24 октомври 2023 (МИА) – Во првостепениот Специјален суд против организиран криминал и корупција во Тирана денеска треба да биде сослушан поранешниот премиер Сали Бериша за приватизацијата на спортскиот комплекс „Партизан“, но, тој од седиштето на Демократската партија порача дека „не може да оди“.

Додаде дека е „подготвен да оди кога и да го повикаат, но не може да го прекрши Уставот“ повикувајќи се на имунитетот што го има како пратеник.

-Сè додека овој закон е во согласност со Уставот, не можам да прифатам никаков компромис за негово прекршување. Подготвен сум да ги преземам сите правни чекори за одбрана на Уставот. Подготвен сум да се јавам да ме испрашуваат за што било, но не можам да го кршам Уставот. Не можеме различно да го толкуваме Уставот. Јас сум коректен, рече тој.

Бериша е под истрага на СПАК за обвинението за „пасивна корупција на функционер“, бидејќи како тогашен премиер помогнал во приватизацијата на спортскиот комплекс, во полза на зетот за ќерка, Јамабер Малтези, за што може да добие казна затвор во траење од четири до 12 години.

Малтези и Фатмир Бекташи, сопственик на градежна компанија се обвинети за корупција и перење пари, за што е предвидена затворска казна во траење од 5 до 15 години.

Судот, синоќа на Малтези, кој беше уапсен во саботата вечер на аеродромот во Тирана, му одреди мерка притвор, додека на Бакташи, мерка за редовно јавување во судот.

На просторот на некогашниот спортски комплекс се изградени 17 повеќекатници од што Малтези профитирал 5,4 милиони евра. Нему привремено му се конфискувани 16 станови, вила на море, шест банкарски сметки, како и акции во три фирми. вт/сд/