Њујорк, 27 септември 2024 (МИА) – Германската министерка за надворешни работи Аналена Бербок повика да се избере првата жена што ќе ги предводи Обединетите нации, барајќи од меѓународната организација да избере жена генерален секретар по речиси 80 години машко лидерство.

Жените сочинуваат 50 отсто од секоја земја, рече Бербок на Генералното собрание на ОН во Њујорк, „но во 80 години оваа организација никогаш немала жена генерален секретар“.

- Значи, ако оваа организација повикува на еднаквост и правда во светот, одамна требаше да го покажеме тоа овде во Њујорк, додаде таа.

- Следниот генерален секретар на оваа организација треба да биде жена, рече Бербок.

Досега имало девет шефови на светската организација, сите мажи, вклучувајќи го и актуелниот генерален секретар Антонио Гутереш.

Гутереш, чиј втор мандат завршува во 2026 година, изрази поддршка за жена наследник.

Во круговите на ОН, за најверојатен следен лидер се смета на лице од Глобалниот југ, а премиерката на Барбадос, Миа Мотли е потенцијален кандидат. јт/

Фото: ЕПА