Вевчани, 10 август 2024 (МИА) - Јавното претпријатие „Еремја“ од Вевчани најави рестриктивни мерки за да се обезбедат потребните количини вода и за домаќинствата кои живеат во највисоката зона во Вевчани.

Оттаму апелираа до корисниците на водоводната мрежа рационално и внимателно да ја користат водата за пиење.

- Единствена можност што моментално ја имаме е воведување рестрикции во текот на вечерните часови со цел да се наполни резервоарот „Смолејца“ и да обезбедиме вода за сите домаќинства во текот на денот. Доколку во попладневните часови резервоарот се испразни или е со минимално количество вода, водоснабдувањето ќе биде прекинато од 23 часот до 5 часот наутро, за сите корисници на „горна зона“, соопшти ЈП „Еремја“. 

Населението, како што посочуваат, да ја користи водата исклучиво за пиење и потреби во домаќинствата, а не за наводнување земјоделски површини, паркови и дворови, и да не нанесува директна штета на целиот водоснабдителен систем. сс/ар/