Загреб, 8 февруари 2021 (МИА) - Речиси половина Хрвати би биле вакцинирани против коронавирусот, додека четвртина не сакаат да примат вакцина, покажуваат резултатите од истражувањето спроведено на примерок од 1.300 лица од 2 до 5 февруари. Истражувањето покажа дека 47,4 проценти од испитаниците би се вакцинирале веднаш штом ќе добијат шанса, додека 13,6 проценти би биле вакцинирани само откако ќе видат какви ќе бидат последиците врз другите луѓе. Околу една четвртина од испитаниците, или 28 проценти, не планираат да бидат вакцинирани, а 11 проценти од нив се неодлучни. Процентот на оние кои би биле вакцинирани се зголемува во споредба со пред три месеци, од 52 на 61 процент. Во споредба со декември минатата година, има помалку луѓе кои не би биле вакцинирани, како и оние кои се неопределени. Со оглед на тоа што доставувањето вакцини досега одобрени е одложено, една третина од испитаниците сметаат дека треба да се земат и руските и кинеските вакцини. Петтина сметаат дека треба да биде само руска вакцина, а само 2,5 проценти од испитаниците се согласуваат дека треба да биде кинеска вакцина. Една четвртина од испитаниците не би се одлучиле ниту за кинеска или руска вакцина. зш/