Пекинг, 16 јули 2023 (МИА) - Американскиот претставник за климата Џон Кери денеска пристигна во Кина за да ги обноват преговорите меѓу двата најголеми светски емитери на гасови што ги затоплуваат планетите, објавија државните медиуми.

Почнувајќи од понеделник, „Кина и Соединетите Американски Држави ќе имаат детална размена на мислења“ за климатските прашања, објави државната телевизија Си-Си ТВ по пристигнувањето на Кери во Пекинг.

Посетата на Кери на Пекинг доаѓа во време на рекордни летни горештини за кои научниците велат дека се влошуваат поради климатските промени.

Билатералните разговори за климата заглавија минатата година откако Ненси Пелоси, тогашната претседателка на Претставничкиот дом на САД, го посети Тајван и го налути Пекинг, кој го смета островот за своја територија.

Но, како што посочуваат странските агенции, Кери, поранешен државен секретар, има релативно срдечни односи со Кина и покрај несогласувањата меѓу Вашингтон и Пекинг околу Тајван и многу други проблематични прашања, вклучително и напредните полупроводници.

Неговата посета на Пекинг доаѓа по две други посети на високи американски функционери - прво на државниот секретар Ентони Блинкен, а потоа и на министерката за финансии Џенет Јелен со цел да се стабилизираат односите меѓу САД и Кина.

Администрацијата на Бајден ја идентификуваше климата како област за потенцијална соработка со Пекинг, и покрај тензиите во другите области.

Повторното покренување на американско-кинеските преговори за климата доаѓа по најжешката недела забележана на глобално ниво, според Светската метеоролошка организација.

„Кери ќе се обиде да го искористи своето време во Пекинг за соработка со кинеските претставници, земајќи го предвид јакнењето на имплементацијата и амбициите и промовирањето на успешен КОП 28“, соопшти Стејт департментот, осврнувајќи се на климатските разговори на ОН во ноември.

Речиси 200 земји ќе учествуваат во Обединетите Арапски Емирати на КОП 28 за да изготват начини за ублажување на глобалното затоплување и неговите ефекти. паг/

Фото: МИА архива