Ријад, 12 јануари 2025 (МИА) - Шпекулациите за иднината на Дарвин Нуњез продолжуваат, а најновата е дека сериозен интерес за напаѓачот на Ливерпул покажува саудиски Ал-Хилал.

Уругваецот досега имаше лоша сезона и се тврди дека „црвените“ веќе бараат купувач за него. Проблемот е што на „Енфилд“ поставија многу висока цена за Нуњез за да може клубот да ги врати парите што ги вложи во него. Тие првично платија 64 милиони фунти за голгетерот на Бенфика, а со бонуси за бројот на одиграни натпревари, сумата веќе порасна на 76,6 милиони.

Токму затоа Ливерпул постави висока цена, која според „Енфилд воч“ изнесува 85 милиони фунти. Тешко дека некој клуб од Европа ќе ја плати оваа сума за Нуњез, иако се шпекулираше дека интерес покажале Милан и Барселона. Сепак, клубовите од Саудиска Арабија се способни да се приближат до бројката што ја сака Ливерпул.

Се тврди дека Ал-Хилал има намера да го доведе Нуњез пред Светското клупско првенство летово. Тренер на тимот е Хорхе Жесус, кој работеше со Нуњез во Бенфика. Уругваецот под негово водство постигна 32 гола и забележа 14 асистенции на 66 натпревари.

Ал-Хилал ова лето би можел да се раздели со својата голема ѕвезда Нејмар, кој неодамна призна дека би сакал повторно да се обедини со Лионел Меси и Луис Суарез во Интер Мајами. дс

Фото: Архива