Мадрид, 7 ноември 2024 (МИА) - Давид Алаба направи многу важен чекор кон неговото враќање во игра, откако дефанзивецот денеска продолжи со тренинзите со топка. 

Австриецот нема играно од 17 декември 2023 година, кога ги скина вкрстените лигаменти на левата нога што го зафати и менискусот. Ова се случи на натпреварот од Ла Лига против Виљареал (4:1). 

Алаба потоа направи две операции на коленото. За прв пат од овој тежок момент, денеска 32-годишниот фудбалер одржа тренинг со топка во клупската база на Реал Мадрид.

Првично се најавуваше дека Алаба ќе се врати на терените во октомври, но неговото закрепнување е одложено и дури се шпекулира дека компликациите од повредата би можеле да ја завршат кариерата на Австриецот. Ова, за среќа, се покажа дека е многу претерано. Кога ќе се врати на теренот, Алаба буквално ќе биде ново засилување за Карло Анчелоти, кој има многу кадровски проблеми во одбраната.

Другата добра вест од денеска е дека Федерико Валверде ќе му биде на располагање на Италијанецот за пресметката со Осасуна. Тој имаше проблеми со грбот поради што беше заменет на полувремето од мечот со Милан, но сега се е во ред со него. дс

Фото: Архива