Координација утре во Собрание за седниците за оставка и избор на техничката влада
- Претседателот на Собранието, Талат Џафери, утре ќе одржи неформална средба со претставници на медиумите, на која, како што е најавено, ќе се разговара за тековните и идните активности на Собранието. Претходно Џафери ќе има ад хок координација, на која, како што информираат од Собрание, ќе се утврдат точните датуми на седниците за оставките и за изборот на техничката влада.
![Координација утре во Собрание за седниците за оставка и избор на техничката влада](https://new.mia.mk/index.php/images/20240123141507_big_730x400_80.webp )
Скопје, 23 јануари 2024 (МИА) - Претседателот на Собранието, Талат Џафери, утре ќе одржи неформална средба со претставници на медиумите, на која, како што е најавено, ќе се разговара за тековните и идните активности на Собранието.
Претходно Џафери ќе има ад хок координација, на која, како што информираат од Собрание, ќе се утврдат точните датуми на седниците за оставките и за изборот на техничката влада.
Активностите на пленарна седница во Собранието, како што беше претходно најавено се следни: констатирање на оставка на претседател на Влада (Димитар Ковачевски) и претседател на Собрание (Талат Џафери), избор на нов претседател на Собрание (Јован Митрески), информирање на претседателот на државата за доделување на мандат на нов претседател на Влада (Талат Џафери), избор на Влада, министри, заменици министри и дополнителни заменици министри, како и констатирање на престанок на мандат на пратеник и верификација на мандат на нов пратеник во Изборна единица 5.
До недела на полноќ (28 јануари) земјава треба да добие трета преодна влада која ќе ја предводи Талат Џафери, актуелен претседател на Собранието.
Оваа Влада се бира сто дена пред парламентарните избори на 8 мај, а две недели претходно, на 24 април, ќе се одржат претседателските избори. Подготовките и кадровското екипирање на техничката влада се во тек, и се очекува да финишираат до петок.
Премиерот Димитар Ковачевски и опозициската ВМРО-ДПМНЕ влегоа во политичка дебата за недавањето поддршка за техничката влада и можноста функциите за опозицијата да останат празни.
Ковачевски вчера изјави дека техничката влада е законска обврска и политичките партии од власта и опозиција треба да предложат свои кандидати и да ја поддржат во Парламентот. Тој вели дека има доволно време да се завршат формалностите и в недела да има гласање.
ВМРО-ДПМНЕ, во контекст на формирањето на техничката влада и изјавата на Ковачевски нивните места да останат празни додека не ја гласаат техничката влада, посочува на членот 3 од Законот за Влада, во којшто, меѓу другото, се вели дека „мандатарот предлага министри за секое од министерствата утврдени со закон и министри без ресор“.
Опозициската партија се уште нема донесено одлука за кадровските решенија во министерствата за внатрешни работи и за труд и социјална политика и за дополнителните заменици министри.
На координациите со Џафери редовно не присуствуваат претставници на опозициската ВМРО-ДПМНЕ, а сега и претставниците на албанската опозиција, која го бојкотира Собранието поради тоа што не е прифатен нивниот кандидат за член на Државната изборна комисија. аа/нд/
Фото: МИА архива