Берово, 1 април 2025 (МИА) - Градоначалник на Берово, Звонко Пекевски денеска оствари средба со австрискиот амбасадор во Скопје, Мартин Памер. На средбата со амбасадорот кој за прв пат ја посети Општина Берово, како што истакна Пекевски се разговарало за конкретните чекори што се преземаат, со цел интензивирање на билатералната соработка, помеѓу нашата држава и Австрија.

-Главен акцент на разговорите се во насока на унапредување на системот за комунална хигиена и системот за противпожарна заштита. Изразив благодарност за поддршката која Австрија ја овозможи за Берово, во текот на пожарите 2021 година, како и за досегашната соработка и на амбасадорот му ја претставив Општина Берово како и можностите за развој, истакна Пекевски.

Беровскиот градоначалник од амбасадорот Памер добил известување дека е во тек проект за поддршка за формирање на доброволни противпожарни единици во повеќе градови, при што Општина Берово би можела да се вклучи во проектот.
 
Памер во рамки на престојот заедно со Пекевски ги посетија фирмата „Агромакс“, Домот за стари лица „Д-р.Иван Влашки"“ и Музејот на град Берово. вс/нд/

Фото: МИА