Ова јадење е вкусна и хранлива комбинација од ориз, мелено месо и свеж спанаќ. Се подготвува лесно, а може да се сервира како печено јадење или како чорбеста варијанта, во зависност од вашите желби.

Состојки:

• 5 лажици масло
• 1 средна главица кромид
• 1 среден морков
• 4 чешниња лук
• 300 грама мешано мелено месо
• 200 грама ориз
• 300 грама спанаќ
• 1/2 лажичка сол
• лажица црвен пипер
• Бибер и сув зачин по вкус

Подготовка:
 
Во тенџере загрејте го маслото на тивок оган. Додадете ситно сечкан кромид и пржете додека омекне, потоа посолете. Додадете го морковот исечен на коцки ситни и кратко пропржете. Потоа ставете го меленото месо и динстајте со мешање додека не ја смени бојата. Додадете ситно сечкан лук, црвен пипер, бибер и сув зачин по вкус. Во смесата додајте го претходно измиениот ориз и налејте топла вода колку да го покрие. Оставете да проврие, па додадете го исчистениот, измиен и ситно сечкан спанаќ. Смесата префрлете ја во огноотпорен сад или тава. Доколку е потребно, додајте уште малку вода. Печете во загреана рерна на 220°C околу 25 минути.

За чорбеста варијанта: по додавањето на спанаќот, налејте повеќе вода и оставете јадењето кратко да проврие.

За посна верзија: едноставно изоставете го меленото месо.

Фото: Фрипик