Скопје, 28 февруари 2026 (МИА) - Градоначалникот на Крива Паланка Сашко Митовски  денеска на прес-конференција реагираше на укажувањето на Агенцијата за храна и ветеринарство во врска со надлежностите на општината и побара  итно спроведување на правосилното и извршно решение донесено на 5 март 2024 година, со кое е изречена мерка за одземање добиток, во согласност член 36 од Законот за заштита и благосостојба на животните.

-Обидите за префрлување на одговорноста кон општината се правно неосновани и не ја менуваат фактичката состојба бидејќи решението е донесено од страна на Агенцијата, правосилно е и извршно од април 2024 година, но до денес не е спроведено. Надлежноста за донесување и спроведување на мерката за одземање е исклучиво на Агенцијата и општината нема законска основа да ја преземе таа надлежност. Во таа насока,  институционалната одговорност не може да се релативизира преку јавни соопштенија, рече Митковски на прес-конференцијата. 

Посочи дека проблемот со добитокот што со години предизвикува штети во Крива Паланка продолжува да создава последици врз јавните површини, приватниот имот, безбедноста во сообраќајот и благосостојбата на животните.

-Општината останува подготвена да обезбеди логистичка и кадровска поддршка за спроведување на решението, но не може и нема да ја преземе законската надлежност на државна институција. Времето за меѓуинституционално препукување е завршено, очекуваме постапување на терен, согласно сопственото правосилно и извршно решение, изјави Митковски реагирајќи на вчерашното соопштение со кое АХВ повика дека општината има одговорност за овој проблем. 

Го потсетуваме Митовски дека неодговорно е кон сопствените граѓани и жители на паленечките села тој да се иззема од одговорност, која ја има во овој случај, бидејќи во согласност со Законот за јавната чистота, член 14 став 1 точка 11, контролата на одржувањето на јавните површини, односно чување и напасување крупен добиток (вклучително и говеда) на јавни површини ја има токму Општината, наведе АХВ. хс/

Фото: МИА архива