Делчево, 15 декември 2025 (МИА) - Општина Делчево распиша јавен повик за доделување награди и признанија за избор на млад надежен спортист, спортист на годината, тренер на годината и спортска екипа на годината за 2025 година.

Како што информираат од локалната самоуправа, повикот се распишува врз основа на Програмата за спорт на Општина Делчево, а наградите ќе се доделуваат за постигнати резултати во индивидуален и екипен спорт. Право на предлагање кандидати имаат спортските клубови со седиште во Делчево, нивните членови, како и физички и правни лица.

Изборот ќе се врши во четири категории: млад надежен спортист/ка, спортист/ка на годината, тренер на годината и спортска екипа на годината. Наградите за млад надежен спортист, спортист и тренер можат да бидат доделени и на спортисти кои настапуваат надвор од територијата на Општина Делчево.

Наградите се доделуваат во форма на парични средства и плакета. Висината на паричните награди изнесува 10.000 денари за најдобар млад надежен спортист, 15.000 денари за најдобар спортист и тренер, како и 20.000 денари за најдобра спортска екипа.

Јавниот повик трае 12 дена и ќе биде отворен до 22 декември 2025 година. Пријавите се поднесуваат до архивата на Општина Делчево или по пошта на адреса ул. „Светозар Марковиќ“ бр.1 - Делчево, со назнака „за избор на спортист на годината“.

Со пријавата потребно е да се достави соодветна документација, вклучувајќи докази за регистрација на клубот, учество и постигнати резултати на натпревари, краток опис на кандидатурата и доказ за жителство. вс/фф/

Фото: Општина Делчево