Штип, 23 март 2026 (МИА) – На Универзитетот „Гоце Делчев“ (УГД)-Штип денеска почна тридневен меѓународен настан ACE²-EU Stakeholder Engagement Workshop на кој што присуствуваа студентите и универзитетски професори од девет европски универзитети, кои се дел од европската Алијанса. Станува збор за тридневна работилница во рамки на европската универзитетска алијанса ACE²-EU, насочена кон унапредување на студентската и академската мобилност, како и развој на нови образовни и истражувачки програми.

Ректорот на УГД-Штип, Дејан Мираковски вели дека студентите и професорите  имаат можност да работат на креирање на нови студиски програми, прилагодени на пазарот на труд, со што ќе се создаде кадар кои ќе одговори на современите предизвици. 

-Веќе паралелно се работат неколку заеднички студиски програми во областа на фармацијата, здравството, како и во техничките струки, пред се во областа на вештачката интелигенција и инженерство на животна средина- рече Мираковски. 

Универзитетската професорка Витана Вичење од Универзитетот за применети инженерски науки од Литванија истакна дека имаат план да достигнат околу 9.000 мобилности на студенти, професори и вработени на деветте универзитети, кои се дел од европската Алијанса. Таа додаде дека станува збор за мешани мобилности со физичко присуство, но и мобилности со виртуелна компонента. 

-Денешната цел е тука да ги воочиме сите оние досегашни предизвици, недостатоци проблеми кои појавија околу досегашните мобилности, кои што во Алијансата биле околу 1.000 и да се обидеме да ги мапираме, структуираме бенефициите, како и идните насоки за тоа како да ги подобриме, а и ние како да се подобриме во насока на остварување на овие мобилности- вели Вичење. 

Соња Манкалијано, членка на студентското тело на Алијансата, посочи дека на оваа работилница студентите од деветте универзитети имаат можност да ги споделат сите позитивни и негативни искуства, кои што произлегуваат од мобилноста, односно размената. 

-Најинтересни можности за соработка за нас од аспект на студентите се практично едукативните активности кои ги нуди Алијансата, тоа се различните Еј-би-си школи, меѓутоа и различните едукативни и образовни формати. Нашиот интерес како студенти не застанува тука. Ние сме заинтересирани за волонтерските активности кои што ги промовира Алијансата, но и за можноста за стажирање во одредени други институции, или партнер институции на Алијансата. Така што нашата идеја преку овие активности е ние да развиеме еден вид на алтруизам, еден вид на соработка помеѓу нас самите и универзитетите, кои на нас ќе ни помогнат во градењето на нас, како личности- вели Манкалијано

Таа додава дека секако има разлика меѓу универзитетите, но досега од она што можела да забележи е и оти има сличности меѓу универзитетите во начините на комуникација и во поставеноста на системот. вдј/вј/

Фото: МИА