МНРиНТ: Над 400 граѓани побарале информации за евакуација, а 30 од нив се подготвени да го напуштат Блискиот Исток
Скопје, 2 март 2026 (МИА) - Во сгласност со последните информации добиени од дипломатско-конзуларните претставништва на Република Северна Македонија, повеќе од 400 граѓани побарале информации во врска со можноста за евакуација, а 30-ина од нив изразиле подготвеност да ги напуштат земјите од Блискиот Исток прри првата можност, информираат од Министерството за надворешни работи и надворешна трговија.
За граѓаните што се наоѓаат во Обединетите Арапски Емирати и во Државата Катар, во согласност со информациите и насоките од надлежните институции, во моментот не постојат безбедни услови за евакуација. За македонските државјани што се наоѓаат во Израел, веќе активно се разгледуваат и координираат потенцијални алтернативи за нивно безбедно извлекување.
Како што нагласуваат од таму, со сите пријавени лица се одржува редовна и континуирана комуникација, при што се преземаат подготвителни активности за евентуална асистенција и нивна безбедна евакуација во зависност од развојот на состојбата.
- Паралелно, дипломатско-конзуларните претставништва ги преземаат сите неопходни мерки за подготовка и безбедна реализација на евакуацијата на граѓаните што изразиле подготвеност за тоа. Министерството за надворешни работи и надворешна трговија е во постојана комуникација со пријателските земји и меѓународните партнери со цел координирано и успешно спроведување на постапката - се вели во соопштението од МНРиНТ.
Министерството за надворешни работи и надворешна трговија преку дежурниот телефонски број и преку дипломатско-конзуларните претставништва, како што се нагласува во соопштението, и натаму останува целосно на располагање на граѓаните. Уште еднаш ги повикуваат сите наши државјани што се наоѓаат во земјите од регионот доследно да ги почитуваат упатствата и насоките на локалните надлежни безбедносни органи.
За дополнителни информации и помош на располагање се:
СОС дежурен телефон (МНРНТ):
075/273-732
Амбасада на Република Северна Македонија во Доха
Тел: +974 50 173 111
Амбасада на Република Северна Македонија во Абу Даби
Тел: +971 56 441 7532
Амбасада на Република Северна Македонија во Тел Авив
Тел: +972 54 500 8566
Тел: +972 54 967 0546 сст/паг/
Фото МИА архива
