Скопје, 17 октомври 2024 (МИА) – Државниот завод за статистика (ДЗС) на Северна Македонија и Канцеларијата на UN Women во земјава го зајакнаа партнерството со потпишување Меморандум за разбирање, за понатамошно унапредување на родовите статистики и промовирање на креирање политики засновани на податоци.

Ова стратешко партнерство, како што е наведено во соопштението од ДЗС, има за цел да го подобри институционалниот капацитет на ДЗС да собира, анализира и дистрибуира податоци специфични за родовите прашања, овозможувајќи подобро следење на родовата еднаквост низ различни национални и локални програми, со што ќе придонесе за родовата еднаквост во земјата.

Соработката ќе се фокусира на зајакнување на улогата на ДЗС во собирањето и толкувањето на родовите податоци, што е од клучно значење за развивање информирани политики кои се однесуваат на уникатните потреби на жените и мажите во Северна Македонија. Со поддршка на UN Women, ДЗС ќе може потемелно да ги интегрира родовите индикатори во својата статистичка рамка и да обезбеди одржливост на оваа експертиза во институцијата.

-Со производството на веродостојни и навремени статистички податоци разделени по пол придонесуваме за креирање на политики, мерки и активности за подобрување на состојбите на полето на родовата еднаквост. Она што го работиме со UN Women e пример на добра и успешна пракса која дава извонредни резултати и придобивки за сите. Со оглед на мандатите што ги имаме како институции, и Државниот завод за статистика и UN Women, секој со своите надлежности, се надградуваме и надополнуваме креирајќи активности и резултати кои претставуваат чекори за исполнување на крајната цел – родова еднаквост подеднакво за сите и насекаде, истакна директорот на Државниот завод за статистика, Дејан Станков.

Помошник генерална секретарка на ОН и заменик-извршна директорка на UN Women за нормативна поддршка, системска координација на ОН и програмски резултати, Нјарадзаи Гумбонзванда посочи дека глобално, родовите статистики поделени по пол се клучни за унапредување на родовата еднаквост, зајакнувањето и правата на жените и девојчињата.

-Во Северна Македонија, нашето партнерство со Државниот завод за статистика ги зајакнува овие глобални заложби преку подобрување на достапноста и квалитетот на родовите податоци. Оваа соработка е од витално значење за обликување политики, развивање и спроведување на релевантни програми и информирање за распределба на ресурсите кои се однесуваат на специфичните предизвици со кои се соочуваат жените и девојчињата, истакна Гумбонзванда.

UN Women и Државниот завод за статистика се посветени да се осигураат дека ова партнерство ќе придонесе за значајни, одржливи промени. Со комбинирање на нивната експертиза, и двете организации имаат за цел да го отворат патот за поправедна иднина каде што сознанијата засновани на податоци претставуваат основа на националните стратегии и поттикнуваат подлабоко разбирање на родовата динамика во Северна Македонија. дма/са/

Фото: Државен завод за статистика