Доха, 24 октомври 2024 (МИА) – Американскиот државен секретар Ентони Блинкен денеска изјави дека разговорите за прекин на огнот во Газа би можеле да продолжат во текот на наредните денови, јави Анадолија.

Говорејќи на прес-конференција во Доха со катарскиот премиер Мохамед бин Абделрахман ал Тани, Блинкен рече дека преговарачите од Газа ќе се сретнат наскоро.

- Разговаравме за опциите да го искористиме овој момент и следните чекори за придвижување на процесот и очекувам нашите преговарачи да се состанат во наредните денови, додаде Блинкен.

Американскиот дипломат рече дека Вашингтон „се спротивставува на секој обид да се наметне опсада и да се изгладнуваат жителите на Газа“.

Тој најави дополнителни 135 милиони американски долари хуманитарна помош за палестинската енклава.