Скопје, 7 април 2026 (МИА) - По повод 7 април, Меѓународниот ден на здравјето, ЈЗУ Здравствен дом „Железничар“ во Скопје организира бесплатни превентивни прегледи со цел навремено откривање и превенција на заболувања. Прегледите ќе се реализираат на платото пред влезот на ЈЗУ ЗД „Железничар“ од 12 до 14 часот. Ќе се вршат прегледи за кардиоваскуларно здравје - мерење крвен притисок, проверка на шеќер и холестерол во крвта, мерење телесна тежина и висина, мерење обем на половина и колк, ќе има можност за консултации со медицински лица, како и други совети за здрав живот - соопштија од јавната здравствена установа.

На акцијата ќе се придружи и „Хема-онко“, здружение посветено на пациенти со рак и нивни негователи. Настанот ќе биде збогатен со изложба на Живко Поповски-Цветин со мото „Цвеќе, здравје, мир“. Тој е познат сликар и хуманист на домашната и меѓународната сцена по својот уникатен уметнички израз, во кој цветот е централниот симбол. Ќе ни се придружат и поетите Драгица Пандиловска, Павле Стојановски и Љубица Бунтеска, како и оперската певица Серафима Фантаузо - информираа од Здравствениот дом. бд/ев/

Фото: МИА архива